واقعية مع نفسك… ولا قاسية عليها؟
ليه سهل علينا نتكلم بحنية وتفهّم مع الناس اللي بنحبهم، لكن لما الدور ييجي علينا، الكلام بيتغير تمامًا؟
صاحبتك غلطت في قرار؟ غالبًا هتحاولي تفهميها، تهديها، وتفكريها إن كلنا بنغلط.
لكن لو إنتِ اللي غلطتي؟
«إزاي كنت غبية وعملت كده؟»
«أنا ليه دايمًا ببوظ الدنيا؟»
«كان المفروض أعرف أحسن من كده.»
وكأن المرور بموقف صعب مش كفاية، فنضيف عليه طبقة تانية من اللوم والقسوة على نفسنا.
وأحيانًا الموضوع ما بيقفش عند الكلام. ندخل في دوائر من التفكير الزائد، نعيد الموقف في دماغنا عشرات المرات، ونفكر في كل الاحتمالات: كان المفروض أقول إيه؟ ليه عملت كده؟ طب لو كنت تصرفت بشكل مختلف؟
لحد ما نوصل لمرحلة الإنهاك… من غير ما نكون بالضرورة وصلنا لفهم أحسن
ليه صوت الناقد الداخلي عالي بالشكل ده؟
كويسة». ساعات بيكون أهدى وأذكى من كده.
يظهر في المقارنة المستمرة، في التركيز على الغلط وتجاهل كل اللي عملتيه صح، أو في تحويل موقف واحد لحكم كامل على نفسك.
بدل «أنا أخدت قرارًا غلط» تبقى «أنا ما بعرفش أخد قرارات».
وبدل «أنا ماعرفتش أتعامل كويس مع الموقف» تبقى «أنا ضعيفة».
وهنا الفرق كبير.
لأن مراجعة تصرف معين بتدينا مساحة نفهمه ونغيره، لكن لما نحول التصرف لحكم على قيمتنا كشخص، بنكون نقلنا نفسنا من المحاسبة لجلد الذات.
والأصعب إننا مع الوقت ممكن نبدأ نصدق إن الطريقة دي مفيدة
هل القسوة على نفسك فعلًا بتساعدك تتغيري؟
في فكرة منتشرة جوانا إننا لو خففنا اللوم على نفسنا هنتهاون.
لازم أقسو على نفسي عشان أتعلم.
لازم ألوم نفسي عشان ماكررهاش.
ولو سامحت نفسي بسهولة، يبقى أنا ببرر لنفسي.
لكن الرحمة بالنفس مش معناها تبرير كل حاجة بنعملها، زي ما الحزم مش معناه القسوة.
تقدري تعترفي إنك غلطتي، تتحملي مسؤولية تصرفك، تصلحي اللي ينفع يتصلح، وتتعلمي من التجربة… من غير ما تحتاجي تهيني نفسك في الطريق.
لأن فيه فرق بين:
«أنا غلطت، محتاجة أفهم ليه وأتصرف بشكل مختلف المرة الجاية.»
وبين:
«أنا غبية، أنا دايمًا بعمل كده.»
الأولى فيها محاسبة. الثانية فيها إدانة
طيب إنتِ شايفة نفسك بعين مين؟
المشكلة إن الناقد الداخلي لما صوته يعلى، بيغيّر العدسة اللي بنشوف بيها نفسنا.
نبدأ نلاحظ التقصير أسرع من الإنجاز، ونفتكر المواقف اللي غلطنا فيها أكتر من المواقف اللي تعاملنا فيها بشكل جيد. وحتى مشاعرنا نفسها ممكن تدخل دائرة النقد.
«أنا ليه زعلانة لحد دلوقتي؟»
«الموضوع مايستاهلش كل ده.»
«أنا المفروض أكون أقوى من كده.»
فنلاقي نفسنا مش بس بنتعامل مع حزن أو ضغط أو علاقة صعبة، إحنا كمان بنلوم نفسنا على إننا شعرنا بالحزن والضغط من الأساس.
وهنا مهم نفرّق بين التفكير اللي بيساعدنا نفهم، والتفكير اللي بيستنزفنا.
مش كل مرة تعيدي فيها الموقف في دماغك تبقى مراجعة للنفس. لو بتلفي في نفس الأسئلة ونفس السيناريوهات من غير معلومة جديدة أو خطوة تقدري تعمليها، فإنتِ غالبًا مش بتحلي المشكلة… إنتِ عالقة جواها
إزاي أحاسب نفسي من غير ما أجلدها؟
ممكن تكوني غلطتي وفي نفس الوقت ماتكونيش إنسانة سيئة.
ممكن تكوني مسئولة عن قرار وفي نفس الوقت تتعاملي مع نفسك بتفهّم.
وممكن تحتاجي تغيّري حاجات في نفسك من غير ما تكرهي النسخة الحالية منك عشان تعرفي تتغيري.
المحاسبة الصحية تسأل:
إيه اللي حصل؟ إيه مسئوليتي فيه؟ وإيه اللي أقدر أعمله بشكل مختلف؟
أما جلد الذات فيفضل واقف عند:
إزاي عملت كده؟ وإزاي أنا بالشكل ده؟
والفرق بينهم مش بسيط.
واحدة بتفتح لك بابًا للحركة والتغيير، والتانية ممكن تسيبك عالقة في مشاعر الذنب والتقصير.
وفي أوقات كتير إحنا فعلًا بنكون بنعمل اللي نقدر عليه، لكن اللي ناقصنا شوية رحمة بنفسنا وطريقة أفضل في التعامل معاها.
مش عشان نبطل نراجع نفسنا، لكن عشان نشوفها بعدسة أكثر عدلا، فيها مسئولية ومحاسبة، وفيها برضه إنسانية وإحسان وتفهّم.
لأنك مش محتاجة تختاري بين إنك تكوني حنينة على نفسك وإنك تكوني حازمة معاها.
تقدري تكوني الاتنين